మనసారా నేడు నీతో మాటలాడ నీరా

మనసారా నేడు నీతో మాటలాడ నీరా
తనివితీర నగుమోమును నను గననీరా

మథుర కేగినచో నీవు మరలివత్తువో రావో
మధురమధుర మందహాస మాకు దూరమగుదువో
సుధామధురమురళీరవసంశోభిత బృందావన మిక
వ్యథ చెంది నేటి నుండి బహుదీనత చెందునో

అచటనున్న వారి బాధ లంతరించ నీవేగిన
ఇచటనున్న వారి శోక మెవరుతీర్తు రింక మీద
ఎచటనున్న నీసుఖమే యెంచు గోపికలకు నీవు
వచియింపుము మరువననుచు పరమపురుష శ్రీకృష్ణా

మరలమరల ముజ్జగముల మరలజేసి మరలజేయు
హరివి నీవు గోపికలను మరవకుందు వని తలతును
మరువలేని గోపీకలకు మహిని మనికి దుర్భరమై
తిరిగి నీవు వచ్చుదాక దేహములెటు నిలుచునో

(76)

5-5-2026